ಒಂಬತ್ತನೆಯ ವಸಂತ ಸಾಹಿತ್ಯೋತ್ಸವದ ವರದಿ
~ಪ್ರತಿಭಾ ಕೇಶವಮೂರ್ತಿ
ಇದೇ ಮೇ ತಿಂಗಳ ದಿನಾಂಕ ೧೮ ಮತ್ತು ೧೯ ಕನ್ನಡ ಸಾಹಿತ್ಯ ರಂಗದ ೯ನೇ ವಸಂತ ಸಾಹಿತ್ಯೋತ್ಸವ, ತ್ರಿವೇಣಿ ಕನ್ನಡ ಸಂಘದ ಆತಿಥ್ಯದಲ್ಲಿ ಅಚ್ಚುಕಟ್ಟಾಗಿ ನಡೆಯಿತು. ಮುಖ್ಯ ಅತಿಥಿಗಳಾಗಿ ಕನ್ನಡ ಸಾಹಿತ್ಯದ ಪ್ರಸಿದ್ದ ಲೇಖಕರೂ, ಪ್ರಕಾಶಕರೂ ಆದ ವಸುಧೇಂದ್ರ ಅವರು ಭಾರತದಿಂದ ಆಗಮಿಸಿದ್ದರು. ಇವರಲ್ಲದೆ, ಆಯುರ್ವೇದ ವೈದ್ಯರೂ, ಕನ್ನಡ ಲೇಖಕಿಯೂ ಆದ ಡಾ. ವಸುಂಧರಾ ಭೂಪತಿ, ಕವಿ ಪ್ರಕಾಶ್ ಕಡಮೆ ಹಾಗೂ ಕತೆಗಾರ್ತಿ ಸುನಂದ ಕಡಮೆ ಅವರೂ ಅತಿಥಿಗಳಾಗಿ ಬಂದಿದ್ದರು. ಕನ್ನಡ ಸಾಹಿತ್ಯ ರಂಗದ ಆಡಳಿತ ಮಂಡಳಿ ಸದಸ್ಯರು, ತ್ರಿವೇಣಿ ಕನ್ನಡ ಸಂಘದ ಸದಸ್ಯರು, ಹಾಗು ಸ್ವಯಂ ಸೇವಕರು ಕೂಡಿ ಕಾರ್ಯಕ್ರಮವನ್ನು ವ್ಯವಸ್ಥಿತವಾಗಿ ನಿರ್ವಹಿಸಿದರು. ಸಾಹಿತ್ಯಕ ಕಾರ್ಯಕ್ರಮಗಳು, ಮನೋರಂಜನೆ ಕಾರ್ಯಕ್ರಮಗಳು, ಊಟ, ಉಪಹಾರ ಎಲ್ಲವೂ ಸೇರಿ ಕರ್ನಾಟಕದಲ್ಲಿ ನಡೆಯುವ ಒಂದು ಹಬ್ಬದ ವಾತಾವರಣ ಮೂಡಿಸಿತ್ತು. ದೇಶದ ನಾನಾಭಾಗಗಳಿಂದ ಬಂದಿದ್ದ ಕನ್ನಡ ಸಾಹಿತ್ಯ ಅಭಿಮಾನಿಗಳು ಎಲ್ಲಾ ಕಾರ್ಯಕ್ರಮಗಳಲ್ಲೂ ಆಸಕ್ತಿಯಿಂದ ಭಾಗವಹಿಸಿ ಸಂತಸಪಟ್ಟರು.
’ಹಚ್ಚೇವು ಕನ್ನಡದ ದೀಪ’ ಸುಮಧುರ ಗಾಯನದೊಂದಿಗೆ ದೀಪ ಬೆಳಗಿ, ಎಲ್ಲರನ್ನೂ ಸ್ವಾಗತಿಸಿ ಕಾರ್ಯಕ್ರಮ ಪ್ರಾರಂಭಿಸಲಾಯಿತು. ಈ ಬಾರಿಯ ಸಮ್ಮೇಳನದ ಮೂಲವಸ್ತು ’ಬದಲಾವಣೆ’. ಮುಖ್ಯ ಅತಿಥಿ ವಸುಧೇಂದ್ರ ಅವರು ಈ ವಿಷಯವಾಗಿ ಮಾತನಾಡಿ ಬದಲಾವಣೆಯ ಪ್ರಸ್ತುತತೆಯನ್ನು ವಿವರಿಸಿದರು. ನಂತರ ಒಂದರ ಹಿಂದೆ ಒಂದು ಸಾಹಿತ್ಯ ಕಾರ್ಯಕ್ರಮಗಳ ಸಾಲು. ಕಳೆದ ವರ್ಷ ಅಗಲಿದ ಕನ್ನಡ ಸಾಹಿತ್ಯ ರಂಗದ ಮೊದಲ ಅಧ್ಯಕ್ಷ ಎಚ್.ವೈ.ರಾಜಗೋಪಾಲ್ ಅವರಿಗೆ ಮನಮುಟ್ಟುವ ಶ್ರದ್ದಾಂಜಲಿ ಅರ್ಪಿಸಲಾಯಿತು. ದಿವಂಗತ ರಾಜಗೋಪಾಲ್ ಅವರ ಪತ್ನಿ ವಿಮಲ ರಾಜಗೋಪಾಲ್ ಮಾತನಾಡಿ, ರಾಜಗೋಪಾಲ್ ಅವರ ಜೀವನದಲ್ಲಿ ನಡೆದ ಕೆಲವು ಹಾಸ್ಯ ಪ್ರಸಂಗಗಳನ್ನು ಹಂಚಿಕೊಂಡರು. ರಾಜಗೋಪಾಲ್ ಅವರಲ್ಲದೆ, ಕಳೆದೆರೆಡು ವರ್ಷಗಳಲ್ಲಿ ದಿವಂಗತರಾದ ಪ್ರಭುಶಂಕರ, ಸುಮತೀಂದ್ರ ನಾಡಿಗ್, ಗಿರಡ್ಡಿ ಗೋವಿಂದರಾಜು ಮತ್ತು ಎಮ್.ಎನ್.ವ್ಯಾಸರಾವ್ ಅವರುಗಳಿಗೂ ಶ್ರದ್ದಾಂಜಲಿ ಅರ್ಪಿಸಲಾಯಿತು. ’ನಮ್ಮ ಬರಹಗಾರರು’ ಕಾರ್ಯಕ್ರಮದಲ್ಲಿ ಅಮೇರಿಕದ ಕನ್ನಡ ಬರಹಗಾರರ ಪುಸ್ತಕಗಳ ಪರಿಚಯ ಮಾಡಿಕೊಡಲಾಯಿತು. ಸುಮಾರು ಹತ್ತಕ್ಕೂ ಹೆಚ್ಚು ಪುಸ್ತಕಗಳ ಪರಿಚಯವನ್ನು ಬರಹಗಾರರೊಂದಿಗೆ ವೇದಿಕೆಯ ಮೇಲೆ ಇದ್ದ ಸಾಹಿತ್ಯಾಭಿಮಾನಿಗಳು ಮಾಡಿಕೊಟ್ಟರು. ಬರಹಗಾರರಿಗೂ ತಮ್ಮ ಪುಸ್ತಕದ ಬಗ್ಗೆ ತಮ್ಮ ಅನಿಸಿಕೆಗಳನ್ನು ಹಂಚಿಕೊಳ್ಳುವ ಅವಕಾಶವಿತ್ತು.
ತಾಯ್ನಾಡಿನಿಂದ ಸಾವಿರಾರು ಮೈಲಿಗಳ ದೂರವಿದ್ದೂ, ಕನ್ನಡ ಅಭಿಮಾನ ಉಳಿಸಿ ಬೆಳೆಸುತ್ತಿರುವ ಈ ಬರಹಗಾರರ ಕೊಡುಗೆ ಶ್ಲಾಘನೀಯ. ’ಸ್ತ್ರೀ ಸಂವೇದನೆ’ ಸಂವಾದದಲ್ಲಿ ಭಾಗವಹಿಸಿದ ಡಾ. ವಸುಂಧರ ಭೂಪತಿ ಅವರು, ಸೂಕ್ಶ್ಮ ವಿಷಯವಾದ ’ಭ್ರೂಣ ಹತ್ಯೆ’ ಬಗ್ಗೆ ಮಾತನಾಡಿ ತಮ್ಮ ವೃತ್ತಿ ಜೀವನದಲ್ಲಾದ ಅನುಭವಗಳನ್ನು ಹಂಚಿಕೊಂಡರು. ’ಅನುವಾದ ಸಂವಾದ’ ಕಾರ್ಯಕ್ರಮದಲ್ಲಿ ಮಾತನಾಡಿದ ಶ್ರೀ ವಸುಧೇಂದ್ರ ಅವರು, ಅನುವಾದ ಸಾಹಿತ್ಯ ಮೂಲ ಸಾಹಿತ್ಯಕ್ಕೆ ಆದಷ್ಟು ಹತ್ತಿರ ತರುವ ಪ್ರಯತ್ನವನ್ನು ಬರಹಗಾರರು ಮಾಡುತ್ತಾರೆ, ಆದರೂ ಅದು ಮೂಲ ಸಾಹಿತ್ಯಕ್ಕೆ ಪರ್ಯಾಯವಾಗುವುದಿಲ್ಲ, ಇದು ಒಂದು ಸಣ್ಣ ತಂಬಿಗೆಯಲ್ಲಿ ಗಂಗೆಯನ್ನು ತಂದು ತುಂಗೆಯಲ್ಲಿ ಬರೆಸುವ ಸಂಪ್ರದಾಯದಂತೆ ಎಂದರು. ಇತರ ಸಾಹಿತ್ಯ ಕಾರ್ಯಕ್ರಮಗಳಾದ ಸಂವಾದ – ಸಣ್ಣ ಕಥೆಗಳು, ಪುಸ್ತಕ ಸಂಸ್ಕೃತಿ ಹಾಗು ಸಾಹಿತ್ಯ ಗೋಷ್ಠಿ ಚೆನ್ನಾಗಿ ಮೂಡಿ ಬಂದವು. ಎಲ್ಲಾ ಸಾಹಿತ್ಯ ಕಾರ್ಯಕ್ರಮಗಳೂ ಎಲ್ಲರಲ್ಲಿ ಆಸಕ್ತಿ ಮೂಡಿಸಿ, ಚಿಂತನೆಗೆ ಒಳಪಡಿಸಿ ಇನ್ನೂ ಸ್ವಲ್ಪ ಹೊತ್ತು ಮುಂದುವರಿಯಬಹುದಿತ್ತೇನೋ ಅನ್ನುವಂತಿತ್ತು.
ಈ ಸಮ್ಮೇಳನದಲ್ಲಿ ಎರಡು ಪುಸ್ತಕಗಳನ್ನು ಬಿಡುಗಡೆ ಮಾಡಲಾಯಿತು. ಮೊದಲ ಪುಸ್ತಕ ’ಬದಲಾವಣೆಯ ಬೆನ್ನಟ್ಟಿ’. ಈ ಪುಸ್ತಕ ಬದಲಾವಣೆ ಎಂಬ ವಿಷಯವನ್ನು ಆಧರಿಸಿ ಅಮೇರಿಕದ ವಿವಿಧ ಕನ್ನಡ ಬರಹಗಾರರ ಲೇಖನ, ಕಥೆ, ಕವನ, ಪ್ರಬಂಧಗಳನ್ನು ಹೊಂದಿದೆ. ಈ ಪುಸ್ತಕವನ್ನು ಸಂಪಾದಿಸಿದವರು ಪ್ರಕಾಶ್ ನಾಯಕ್ ಹಾಗೂ ಶಂಕರ್ ಹೆಗಡೆ. ಎರಡನೆಯ ಪುಸ್ತಕ ’ಆಪ್ತವಲಯದಲ್ಲಿ ಅಮೇರಿಕನ್ನಡಿಗ – ಎಚ್.ವೈ.ರಾಜಗೋಪಾಲ್’. ಈ ಪುಸ್ತಕ ದಿವಂಗತ ಎಚ್.ವೈ.ರಾಜಗೋಪಾಲ್ ಅವರನ್ನು ಕುರಿತು ಅವರನ್ನು ಹತ್ತಿರದಿಂದ ಕಂಡು ಅವರೊಡನೆ ಒಡನಾಡಿದ ಬಂಧು ಮಿತ್ರರ ನೆನಪುಗಳ ಸಂಕಲನ. ಈ ಪುಸ್ತಕವನ್ನು ಸಂಪಾದಿಸಿದವರು ಮೈ.ಶ್ರೀ.ನಟರಾಜ ಹಾಗೂ ತ್ರಿವೇಣಿ ಶ್ರೀನಿವಾಸರಾವ್. ಈ ಎರಡು ಪುಸ್ತಕಗಳೊಂದಿಗೆ ಸಮ್ಮೇಳನದ ಸ್ಮರಣ ಸಂಚಿಕೆ ’ತಳಿರು’ ಪುಸ್ತಕವನ್ನೂ ಆಗಮಿಸಿದ ಎಲ್ಲಾ ಸಾಹಿತ್ಯಾಭಿಮಾನಿಗಳಿಗೆ ಹಂಚಲಾಯಿತು. ’ತಳಿರು’ ಸಮ್ಮೇಳನದ ಬಗ್ಗೆ ಮಾಹಿತಿ ಒದಗಿಸುವುದರ ಜೊತೆಗೆ, ಕನ್ನಡ ಸಾಹಿತ್ಯ ರಂಗ ನಡೆದು ಬಂದ ದಾರಿ ಹಾಗೂ ಹಿಂದಿನ ೮ ಸಮ್ಮೇಳನಗಳ ಬಗ್ಗೆ ವಿವರಗಳನ್ನು ಹೊಂದಿ ಬಹಳ ಸುಂದರವಾಗಿ ಮುದ್ರಿತವಾಗಿದೆ.
ಸಾಹಿತ್ಯ ಕಾರ್ಯಕ್ರಮಗಳ ನಡುವೆ, ಕನ್ನಡ ಸಾಹಿತ್ಯ ರಂಗ, ತ್ರಿವೇಣಿ, ಬೃಂದಾವನ ಹಾಗೂ ನವೋದಯ ಕನ್ನಡ ಕೂಟದ ಸದಸ್ಯರು ವಿವಿಧ ನೃತ್ಯ, ಸಂಗೀತ, ನಾಟಕ ಕಾರ್ಯಕ್ರಮಗಳನ್ನು ಪ್ರಸ್ತುತ ಪಡಿಸಿ ಎಲ್ಲರ ಮನ ರಂಜಿಸಿದರು. ತ್ರಿವೇಣಿ ಸದಸ್ಯರು ಬಹಳ ಆಸಕ್ತಿ ವಹಿಸಿ ಊಟ ತಿಂಡಿಯ ಪಟ್ಟಿ ತಯಾರಿಸಿದ್ದರು. ಕರ್ನಾಟಕದ ವಿಶೇಷ ತಿನಿಸುಗಳಾದ ಅಂಟಿನುಂಡೆ, ಕಾಯಿ ಹೋಳಿಗೆ, ಬಿಸಿಬೇಳೆಬಾತ್ ಇವುಗಳನ್ನು ನಗುಮುಖದಿಂದ ಎಲ್ಲರಿಗೂ ಉಣಬಡಿಸಿದರು. ಕನ್ನಡ ಸಾಹಿತ್ಯ ರಂಗದ ೯ನೇ ’ವಸಂತ ಸಾಹಿತ್ಯೋತ್ಸವ’ ವನ್ನು ಯಶಸ್ವಿಯಾಗಿ ನಿರ್ವಹಿಸಿದ ಕನ್ನಡ ಸಾಹಿತ್ಯ ರಂಗದ ಆಡಳಿತ ಮಂಡಳಿ ಸದಸ್ಯರಿಗೂ, ತ್ರಿವೇಣಿ ಕನ್ನಡ ಸಂಘದ ಸದಸ್ಯರಿಗೂ ಹಾಗೂ ಎಲ್ಲಾ ಸ್ವಯಂಸೇವಕರಿಗೂ ಅಭಿನಂದನೆಗಳು.
